“ყველაფერი უნდა გაკეთდეს იმისთვის, რომ მიხეილ სააკაშვილის ჯანმრთელობა უზრუნველყოფილი იყოს როგორც ეკადრება ყოფილ პრეზიდენტსა და ქვეყანას,” – ასე ეხმაურება პრეზიდენტი მიხეილ სააკაშვილის ჯანმრთელობის მდგომარეობას. სალომე ზურაბიშვილის განცხადებით, თუ ვინმე დაადასტურებს, რომ სააკაშვილის მკურნალობა საქართველოში შეუძლებელია, გადაწყვეტილება მხოლოდ მას შემდეგ უნდა იყოს მიღებული.
მიხეილ სააკაშვილის ჯანმრთელობის მდგომარეობაზე განცხადება დღეს გააკეთა პრემიერ-მინისტრმაც. ირაკლი ღარიბაშვილის განცხადებით, ყოფილი პრეზიდენტის საზღვარგარეთ სამკურნალოდ გადაყვანა სპეკულაციაა და ამის არავითარი საფუძველი არ არსებობს.ღარიბაშვილიამბობს,რომ სააკაშვილმა კეთილი უნდა ინებოს და სასჯელი ბოლომდე საქართველოში მოიხადოს.
მიხეილ სააკაშვილი მეორე დღეს კლინიკა ვივა მედში იმყოფება. კლინიკის მიმდებარე ტერიტორია ისევ ყვითელი ლენტით არის შემოსაზღვრული. დღეს ექსპრეზიდენტთან შეხვედრას მისი პირადი ექიმი ცდილობდა, თუმცა ნიკოლოზ ყიფშიძეს ამის საშუალება არ მიეცა.
„ვივამედის“ დირექტორის, ინფორმაციით, მესამე პრეზიდენტი თერაპიულ განყოფილებაშია მოთავსებული. როგორც ნადირაძე ნინო განმარტავს, მიხეილ სააკაშვილს კვლევები უტარდება, კონკრეტული დასკვნების შესახებ კი, მხოლოდ მას შემდეგ გასაჯაროვდება ინფორმაცია, რაც პაციენტის ნებართვა ექნებათ.
მიხეილ სააკაშვილის დედის ინფორმაციით, პოლონეთი მზად არის, საქართველოს ხელისუფლების თანხმობის შემთხვევაში, მესამე პრეზიდენტის გადასაყვანად თვითმფრინავი გამოყოს, შემდეგ კი სააკაშვილის სათანადო მკურნალობის კურსი უზრუნველყოს.
იუსტიციის სამინისტრომ მიხეილ სააკაშვილს კლინიკა ვივამედში გამოკვლევებზე გადაყვანა 10 მაისს შესთავაზა. მანამდე სააკაშვილის ჯანმრთელობის მდგომარეობაზე მწვავე დასკვნა 27 აპრილს სახალხო დამცველის ეგიდით შექმნილმა კონსილიუმმა გაასაჯაროვა. ექიმების შეფასებით, სააკაშვილის მდგომარეობა გაუარესებულია და დეპრესიის ფონზე მას ანორექსია განუვითარდა. სახალხო დამცველის მიერ შექმნილი კონსილიუმის წევრები ვერ ამბობენ, აუცილებელია თუ არა სააკაშვილის გადაყვანა საზღვარგარეთ. თუმცა თანხმდებიან იმაზე, რომ არასწორმა მკურნალობამ შესაძლოა მძიმე შედეგი გამოიწვიოს. კონსილიუმის დასკვნით, საჭიროა ჩატარდეს ნეიროფსიქოლოგიური და ფიზიკური რეაბილიტაცია. ოჯახის მთავარ მოთხოვნად მსჯავრდებულ სააკაშვილის უცხოეთში სამკურნალოდ გადაყვანა რჩება. ხელისუფლების განცხადებებით კი ნათელია, რომ ექსპრეზიდენტის ქვეყნიდან გაყვანა არ იგეგმება და მისი მკურნალობა საქართველოში მოხდება.
