“ნაციონალური მოძრაობის” ყოფილი თავმჯდომარე ნიკა მელია საკუთარ „ფეისბუქ“ გვერდზე ლევან ხაბეიშვილის მიერ კეზერაშვილთან კვიპროსში გამართული შეხვედრის შესახებ გაკეთებულ განცხადებას გამოეხმაურა.
“უამრავი მნიშვნელოვანი მოვლენა ხდება ქვეყნის შიგნით თუ გარეთ, თუმცა უყურადღებოდ ვერ დავტოვებდი, გუშინ გაჟღერებულ ინფორმაციას, ივანიშვილთან დაახლოებული ბიზნესმენების და ენმ-ს მენეჯმენტის შეხვედრის შესახებ; ჩემთვის მიუღებელია პოლიტიკური კორუფცია, პოლიტიკის ბიზნესად, ფულის შოვნისა და ბიზნეს გავლენების მოპოვების საშუალებად ქცევა, მიუღებელია პოლიტიკური ვაჭრობა, ის ოლიგარქიული მართვის სისტემა, რომელიც ბიძინა ივანიშვილმა შექმნა. თუ რამეა პოლიტიკაში რუსული, არის სწორედ ეს…როდესაც ოპოზიციის წარმომადგენელთა ჯგუფი, სტატუსით გადაწყვეტილების მიმღები, რეალურად კი დავალებების შემსრულებელი, ეახლება კარზე თავის დამფინანსებელსა და “მუსიკის დამკვეთს ” (იმიტომ რომ ასე ესმით, ვინც იხდის, მუსიკასაც ის უკვეთავს), ხვდება “ბიძინასთან დაახლოებულ ბიზნესმენთა ჯგუფს” რა შეიძლება ვიფიქროთ, ან რა უნდა ვიფიქროთ:ამ ხალხისთვის მისაღებია ის კორუფციული სისტემა, რომელიც ქვეყანაში ჩამოყალიბდა, რომ არ იყოს მისაღები, ვერ მოერგებოდნენ. ეს ადამიანები დარიგებული ტენდერებით, რომლებიც ადამიანების სიცოცხლეებს იწირავს, შოულობენ დღეს ფულს.რა მოტივაცია შეიძლება ჰქონდეთ ამ ადამიანებს ოპოზიციურ პოლიტიკურ ჯგუფთან? სულ ორი:ბიძინას ინტერესის გატარება;მთავრობის შეცვლის შემთხვევაში, საკუთარი ინტერესის დალაგება;და რა ინტერესი შეიძლება გქონდეს შენ, ოპოზიციური პარტიის ლიდერს, მსგავს ხალხთან, თუ შენთვის პოლიტიკური კორუფცია მიუღებელია, თუ არსებული სისტემა, არაფორმალური მართვა ფულით, მიუღებელია, თუ ამ ადამიანების ცხოვრებისა ბიზნესის კეთების წესი არის მიუღებელი და თუ მისი შეცვლა გინდა და არა სახელებისა და გვარების ჩანაცვლება. არსებობს ლეგიტიმური კითხვები, რომლებზეც საზოგადოება იმსახურებს პასუხებს, უნდა დასრულდეს პოლიტიკის კულუარებში კეთება და ვიწრო ჯგუფის ინტერესებით პროცესების მართვა…”, – ნიკა მელიას განცხადება.
