უკრაინის უმაღლესი რადას დეპუტატმა, ოლექსი გონჩარენკომ უკრაინის პრეზიდენტს, ვოლოდიმირ ზელენსკისა და უკრაინის ეროვნული უსაფრთხოებისა და თავდაცვის საბჭოს მიმართა, რომ დაუწესდეს სანქციები ბიძინა ივანიშვილს და ირაკლი კობახიძეს. გონჩარენკო ფეისბუქზე წერს, რომ ბიძინა ივანიშვილი პრორუსი ოლიგარქია, რომელმაც “ქართული ოცნება” დააარსა, ირაკლი კობახიძე კი პრორუსულ ნარატივებს ავრცელებს, მათ შორის უკრაინის ომთან დაკავშირებით.
“ვინ არიან ისინი და რატომ არის საჭირო სანქციები? ბიძინა ივანიშვილი არის ქართველი პრორუსი ოლიგარქი, საქართველოს პრემიერ-მინისტრი 2012-2013 წლებში, მაგრამ დღემდე ითვლება „საქართველოს არაფორმალურ მმართველად“. ამავდროულად, მას აქვს მჭიდრო კავშირი რუსულ პოლიტიკურ ელიტასთან, აქტიურად ეწევა რუსეთის წინააღმდეგ სანქციების გვერდის ავლის საკითხს. 2012 წელს მან დააარსა პოლიტიკური პარტია „ქართული ოცნება – დემოკრატიული საქართველო“, რომელიც დღეს მმართველი პარტიაა და რომელსაც ირაკლი კობახიძე ხელმძღვანელობს. კობახიძე თანმიმდევრულად ავრცელებს რუსულ ნარატივებს, მაგალითად, უკრაინის ომს უწოდებს „მაიდანის შედეგს“, დადებითად საუბრობს საქართველოსა და რუსეთს შორის საჰაერო მიმოსვლის აღდგენაზე. 2022 წელს კი რუსეთის ფედერაციასა და საქართველოს შორის ვაჭრობამ მიაღწია რეკორდულ მაჩვენებელს ბოლო 16 წლის განმავლობაში, რაც საქართველოს ხელისუფლების პრორუსული პოლიტიკის შედეგია და პირდაპირ ეწინააღმდეგება უკრაინისა და საქართველოს ორმხრივი ურთიერთობების სტრატეგიულ სულისკვეთებას. სანამ ქართველები უკრაინის მხარეს იბრძვიან, საქართველოს პრორუსული ხელისუფლება რუსეთთან დაახლოებისკენ მიისწრაფვის და მათ ეკონომიკური სიძნელეების დაძლევაში ეხმარება. ამიტომ მიმაჩნია, რომ აუცილებელია ამ ადამიანების მიმართ სანქციების დაწესება,” – წერს ოლექსი გონჩარენკოს.
