აქონდრპლაზიის სინდრომის მქონე ბავშვების მშობლების უწყვეტი პროტესტი გრძელდება. აქონდროპლაზიის სამკურნალო მედიკამენტის, „ვოსორიდიტის“ საქართველოში შემოტანის მოთხოვნით, მშობლები, მეცხრე დღეა, ღამეს კანცელარიასთან ათევენ. ამბობენ, რომ პროტესტს მანამდე არ შეწყვეტენ, სანამ მათი მოთხოვნა არ დაკმაყოფილდება.
საკითხთან დაკავშირებით, საქართველოში შეზღუდული შესაძლებლობის მქონე პირებისა და მათ საკითხებზე მომუშავე 31 ორგანიზაციამ, პრემიერ-მინისტრ, ირაკლი ღარიბაშვილს მიმართა და აქონდროპლაზიის მქონე ბავშვებისა და მათი ოჯახების მხარდაჭერისკენ მოუწოდა. განცხადებაში ნათქვამია, რომ ბავშვებმა იციან, რომ არსებობს რეალური მედიკამენტი, რაც მათ ცხოვრებას რადიკალურად შეცვლის და უწევთ მოლოდინსა და შიშში ყოფნა, მშობლების განცდების გაზიარებასთან ერთად, მათი პირადი შეგრძნებები და ემოციები არ უნდა იყოს უგულებელყოფილი.
