“დაუფინანსეთ წამალი ბავშვებს” – აქონდროპლაზიის სინდრომის მქონე ბავშვების მშობლების საპროტესტო აქცია მთავრობის კანცელარიასთან. უკვე თვეებია მშობლები ქვეყანაში კონკრეტული წამლის შემოტანას ითხოვენ.
აქციის მონაწილეებმა კანცელარიასთან აღმართულ ღობეზე გააკრეს ბანერები წარწერებით – “აქონდროპლაზია არ არის უბრალოდ ზრდის შეფერხება, ნუ გვატყუებთ!” “ნუ წაართმევთ ჩვენს შვილებს ჯანმრთელობის უფლებას”. მშობლები პრემიერთან შეხვედრას ითხოვენ.
აქონდროპლაზიის დიაგნოზის მქონე პაციენტების მშობლებს ჯანდაცვის მინისტრი გუშინ შეხვდა. უწყების ინფორმაციით, ზურაბ აზარაშვილმა შეხვედრაზე მშობლების საჭიროებები მოისმინა და მათ, პრეპარატ „ვოსორიტიდთან“ დაკავშირებით, საერთაშორისო ორგანიზაციებიდან მოპოვებული ინფორმაცია გააცნო. შეხვედრაზე აღინიშნა, რომ მსოფლიოს არცერთ ქვეყანაში, სახელმწიფო ბიუჯეტიდან, აღნიშნული წამლით მკურნალობა, ამ ეტაპზე, არ ფინანსდება. ზურაბ აზარაშვილმა, პაციენტების მშობლებთან შეხვედრაზე, კიდევ ერთხელ დააფიქსირა უწყების მზადყოფნა, რომ ბავშვებს, რომლებსაც სხვა თანმდევი დაავადებები აქვთ, დიაგნოსტიკასა და მკურნალობას როგორც საქართველოში, ისე საზღვარგარეთ, სახელმწიფო დაუფინანსებს.
