ქვეწარმავლების ხშირ გამოჩენას და მათი რაოდენობის ზრდას, სპეციალისტები მაღალ ტემპერატურას უკავშირებენ. ამბობენ, რომ წინა წლების მსგავსად წელსაც ქვეყნის მთელს ტერიტორიაზე ქვეწამავლების სხვადასხვა ტიპის აქტიურობა შეიმჩნევა, თუმცა, მათი თქმით ამ ეტაპზე პანიკის საფუძველი არ არსებობს. ჰერპეტოლოგები მოქალაქეებს რეკომენდაციებით მიმართავენ.
დედაქალაქში ქვეწარმავლების გავრცელების გამო, ცხოველთა მონიტორინგის სააგენტოში გამოძახებებმა იმატა. მხოლოდ ივნისის თვეში 50-მდე შემთხვევა დაფიქსირდა. სააგენტოს წარმომადგენელი საზოგადოებას სიმშვიდისკენ მოუწოდებს და ამბობს, რომ ქვეწარმავლების გავრცელების შესახებ წლევანდელი სტატისტიკა წინა წლების იდენტურია.
თბილისში სულ 14 სახეობის გველი ბინადრობს. ყველაზე გავრცელებული სახეობა კი შხამიანი – გიურზა და ცხვირრქოსანა. როგორც გამოძახებებიდან ირკვევა, ყველაზე ხშირად გიურზა ორთაჭალაში, კრწანისსა და აფრიკის რაიონში ნახეს. კიდევ ერთი შემთხვევა კი დიღმის ტყეში დაფიქსირდა.
